"Oh, Ina" ni Vhen Bautista. "Happy Mother's Day!"

Request and Dedication: "Ngem ne, kitaem ita, nalasatam ti pannubok
para kaniak, maysa met daytoy a saludsod;
no maminsan ti saludsod agbalin a tuok
nangruna no dimo maawatan ken naganus ti panunot."

Kablaaw kadagiti amin nga Inna iti daytoy naisangsangayan nga Aldaw a para kadakuada.

Manipud pay laeng iti studio ti "Sika A Musika 'Toy Pusok," ken ti pannakibinnulig ni Vhen Bautista, ti Prince of Ilocano Songs, iruknoymi kadakayo INA 'toy napnoan kaipapanan a kanta...

 
INA
Ni Rudy Ram. Rumbaoa
[immuna a naiposte iti Iluko.com ken Samiweng ken Ayat]


[Imbagam kaniak a nabukelak
iti nagtipon nga itlog ken semilia,
impaaymo kaniak ti pateg ken dungngo
iti siam a bulan iti saklolom tapno mataripato...]

A, awan siguron ti makaartap
iti ayat, sakripisio, ken kinagasat;
panursuro intukitmo agingga a dimmakelak
iti saklotmo, pammatalgedmo mariknak

Wen, dinto magatadan ti aniaman nga adda
ti ragsak a mariknak, no di ket sika;
maysaka a gameng a silaw ti pamilia
agnanayon a napateg ken naidumduma

Iti naminsan, nagarimasa dagiti luak
sika a karaptak, ni patay gistaynaka intalaw kaniak;
iti dayta a kanito diak malipatan a naangaw ni gasat
no makalagip, umay sumirip tapno marakrak ti ragsak

Ngem ne, kitaem ita, nalasatam ti pannubok
para kaniak, maysa met daytoy a saludsod;
no maminsan ti saludsod agbalin a tuok
nangruna no dimo maawatan ken naganus ti panunot.

Wen, Ina, iti daytoy nainggasatan nga aldawyyo
daytoy ti laglagipek: Saanka a bukod iti amin a tiempo
addanto aldaw a suminaak tapno innak makikaysa
iti matumpongak ken agbalin a nagasat nga asawa

Kunak: Kablaawanka, Ina, iti Aldawmo
agyamanak ta intednaka kadakami ti Dios Apo;
ti biag saan a magatadan ti ania man nga adda
ngem sika't timon tapno iturongmo daytoy iti umno a dana.

[CR.2008.by.rudy.ram.rumbaoa]