"Ala Tata, Nana, ay itdenyo ketdin ala... tupig, tinubong, puto bungbong wenno kuarta. Dikay' agim-imut idasaryo koma, aginaldomi nga umay maki-Paskua..." nagmayat man ti panagpaskua ni Vhen. Ala, danggayantay' man ngarud isuna iti kanta a "Panagrambak."

Request and Dedication: "Mapatit kampana ti simbaan tunggal agsapa misa a nasantoan. Padapada nga intay' rambakan, pannakayanak Messias Mangisalakan. Adda ngarud gagar ken segga, madanonan kastoy a petsa. Adda ragsak tunggal maysa, di malapdan nagpaiduma a rikna..."

"Panagrambak, aldaw kaipapanan a nagasat. Ti Messias inyegna't kappia ken ayat, pammakawan tunggal agkakabsat. Panagrambak anian a nagragsak!"

"Panagrambak anian a nagragsak, iwaksi koma ti apal ken gura. Pagarien pudno nga anag ti Paskua, iti puso, iti panunot, ken kararua...Panagrambak, anian a nagragsak!"

"Ala Tata, Nana, ay itdenyo ketdin ala... tupig, tinubong, puto bungbong wenno kuarta. Dikay' agim-imut idasaryo koma, aginaldomi nga umay maki-Paskua. Danggayandakam' nga agkanta, Naragsak a Paskuayo awan labasna. Panagrambak itay agkaykaysa, aldaw ti Paskua anian a ragsakna..."

"Panagrambak!"

Maysa nga orihinal a komposision a kanta ti Paskua ti "Panagrambak" a sinurat ni Rudy Ram. Rumbaoa, ken musika ni Avelino N. Bautista. Karaman ti nasao a kanta iti album ni Vhen Bautista a napauloan iti "Sagut" kenka ni Vhen Bautista.