Kuna ni Vhen Bautista, ti "Prince of Ilocano Songs" ken agnaeden iti California, USA, a maragsakan a mangisagut daytoy nga albumna kadagiti pada a nangisit ti sikona.

Ti Sagut Kenka ni Vhen [Ita a Paskua]
ni Rudy Ram. Rumbaoa



"DIMTENGEN nabayag nga inur-uray, padapadatay a mangpasangbay; adda ragsak tunggal bumalay, adtoyen aldaw ikkan gundaway..."

Pudno Kaili, dimtengen ti nabayagtayo nga inur-uray-- ti isasangbay ti pannakayanak ti Mannubbot! Paskuan!

Kunana pay iti kanta: "Ayug ti Paskua addan a mangngegan, tunggal umili inda agisaganan; noche buena, tupig wenno suman, pagsasangnguan a dinto malipatan..."

Wen, baknang man wenno pobre, agpapada a mangrambak iti Paskua. Awan ti nangato, awan ti maibilang a nababa iti daytoy napnoan kaipapanan nga aldaw [ngem puera delos buenos, adda dagiti sekta wenno sabali a relihion a di mangrambak iti Paskua]. Padapadatayo iti imatang ti Dios.

Kuna ni Vhen Bautista, ti "Prince of Ilocano Songs" ken agnaeden iti California, USA, a maragsakan a mangisagut daytoy nga albumna kadagiti pada a nangisit ti sikona. Malagip a daytoy ti kaunaan a Christmas albumna a rimmuar idi 2006.

Iti biang ni Vhen, naidumduma daytoy a Christmas albumna no maidilig kadagiti dadduma a rimmuar idin a kantana a Pamaskua.

Daytoy ngamin ti kaunaan nga ayug Pamaskua nga albumna a puro orihinal a komposision. "Panagdedenna" nangruna iti kaaldawan ti Paskua ti konsepto ti album.

Kunana a, "Naipaugalin kadatayo a Filipino ti panagdedenna iti Aldaw ti Paskua. Ket dita ti 'yan ti pudno nga anag ti Paskua."

Agpayso ti kuna ni Vhen, awan ti mamaay ken kaipapanan ti Paskua no saanmo a kadenna ti pamilia. Ti panagdedenna iti Paskua, napnoan ti ragsak. Ket gapu iti daytoy, adu dagiti ka-Filipinoan iti agawid idiay Filipinas tapno madennaan dagiti pampamiliada. Adda ngarud sadiay ti 'yan ti pusoda. Adda iti nakayanakan a daga ti ragsakda!

Iti "Sagut" kenka ni Vhen Bautista a Christmas album, inlawlawagna nga ar-arapaaenna a kanayon ti "Krismas iti Filipinas," maysa kadagiti kanta iti album, ta ditoy a mariknana ti ragsak. 

Iti sabali a bangir, pinutar ni Vhen ti "Pamilia" tapno gutigotenna dagiti kameng ti pamilia nga adda iti sabali a lugar a mapan agbakasion iti Filipinas ken tapno agdedenna dagitoy iti tiempo ti Paskua.

Iti koro ti kanta nga "Aldaw ti Paskua," a sinuratko ken karaman iti album kunana: "Ita ti aldaw ti Paskua, adda ragsak tunggal maysa; ita nga aldaw ti Paskua, iwagsak ti apal ken gura..."

Ti kanta a "Paskua," ipalagipna ken ni Vhen ti kinaadu a tao kadagiti shopping malls wenno tiendaan a mapan aggatang kadagiti regaloda. Sabali laeng ti "Agawidakto [Ikarik Dayta]," iladawan ti kanta ti maysa a pagayamna a kanayon nga agmaymaysa a mangselebrar/mangrambak iti Paskua.

Isagutna met ti kanta a "Baro a Tawen" iti maysa a gayyemna a nayaw-awan-- naisungsong ken nasumokna ti agusar iti maipawil a droga. Kayat nga ipaawat ni Vhen iti kantana, "a saan pay a naladaw ti amin ken adda pay la namnama nga agbalbaliw."

Mabalin met a kantaen ti "Ni Apo Dios ti Mangbendision Kenka" uray saan a panawen ti Paskua ta mabalin a pang-birthday, pangbuniag ken dadduma pay nga okasion ti nasao a kanta.

Pangkoro met ti resulta ti kanta a "Naraniag a Paraangan" ken "Panagrambak."

Manen iti kanta kunana: "Adda koma ayat nga agari, gura a naigamer intay iwaksi; tunggal puso inna koma awaten, pammakawan a di barengbareng..."

Pudno, iti panawen ti Paskua, tiempo ti panagkakappia ken panagpipinnakawan. Ngem puera delos buenos, adu't aginkukuna. Manglimlimo. Aginsasayaat ngem iti naguneg ti pusona, anian a rinuker ken ig-iggesen pay!

Dagiti sabali, gundawayanda daytoy a tiempo. Ngem iti kamaudina, rummuar ti pudno a maris ti kinatao ken ugalina.

Ita a Paskua, sagutannaka ni Vhen iti kanta. Imdengan. Timuden. Riknaen ti apros ti kanta kenka.

Dagiti linaon ti album: "Pamilia," "Paskua," "Agawidakto [Ikarik Dayta]," "Panagdedenna," "Sagut," "Agpayso Kadi nga Adda Santa Claus," "Baro a Tawen" ken "Ni Apo Dios ti Mangbendision Kenka" a sinurat amin ni Vhen.

Sinurat met ti autor ti "Naragsak a Paskuayo," "Aldaw ti Paskua," ken "Panagrambak" idinto a ni Eliseo Contillo ti nangsurat ti "Christmas Bonus," "Naraniag a Paraangan," ken "Aguinaldo." Sinurat ni Fr. Jose Adriano ti "Tallo a Mamasirib."

Naipangruna iti album ti "Krismas iti Filipinas." Inruar ti A & B Records International [Australia/USA] ken inwaras met iti Filipinas ti Synergy Records.

Ni Fr. Adriano ti executive Producer idinto a ni Rosario Canto Bautista, kaingungot ni Vhen, ti Producer. Inurnos ni Eddie "Boss" Velasco dagiti amin a kanta.

Ala ngarud, ag-Paskuatayo. Kunatayo:

*PANAGRAMBAK
[Lyrics by Rudy Ram. Rumbaoa]

i. Mapatit kampana ti simbaan
Tunggal agsapa misa a nasantoan,
Padapada nga intay rambakan
Panakayanak Messias mangisalakan

ii. Adda ngarud gagar ken segga
Madanonan kastoy a petsa,
Adda ragsak tunggal maysa
Di malapdan nagpaiduma a rikna

koro:

Panagrambak anian a nagragsak
Aldaw kaipapanan ken nagasat,
Ti messias yegna't kappia ken ayat
Pammakawan tunggal agkakabsat

Panagrambak intay agkaykaysa
Iwaksi koma ti apal ken gura
Pagarien ti pudno nga anag ti paskua
Iti puso iti pannunot ken kararua

iii. Ala ngarud Tata, alaemon Nana
Tupig, noche buena wenno kuarta
Dikay agimut idasaryo koma,
Aginaldomi nga umay maki-Paskua

iv. Danggayandakam ngad agkanta
Naragsak a paskuayo awan labasna
Panagrambak intay agkaykaysa
Aldaw ti paskua anian a ragsakna!*