Sika ti daniw a putar a nailaga iti barukong.
Sika ti napusaksak a sabong nga ingget banglo-agadiwara;
mutia nga impateg ken inayat 'toy pusok.
Sika ti biag nga angesko...
ti ayat a ragsakko...
ken panungpalak.
Adtoyak, ruknoyakanka iti samiweng a ray-aw ta puso ken riknam...
Request and Dedication: Kuna ni Bobby: "O, Sabong a nagpaiduma ti banglo ken pusaksakna. Palubosam man 'toy numo nga umay mangpuros kenka. Italimengka iti nalmeng ditoy lansad barukongko, siksikanto laeng patiem ti innak patpatgen..."
Insungbat ni Dolly: "Ibagayo Kadi Nga Ur-urayek..."
Ala, intay' man ngarud imdengan no kasanot' panangpuros ni Manong Baro iti kunaenna a sabong a patpatgenna iti kantana a "Sabong A Nagpaiduma." Ket denggentay' met no kasanot' panangsungbat ni Manang Dolly ken ni Manong Baro iti kanta nga "Ibagayo Kadi Nga Ur-urayek."
Ket kamaudiananna, nagsabat met laeng iti dalan da Ari ken Reyna Dagiti Kankanta nga Ilokano.
Request and Dedication: "No dumteng ti oras ken tiempo a panaginana. Dagiti nalupoy, nalap-it a taktakiagna, inna yarakup sanakto iduayya. 'Ala, maturogkan, naimbagto la no dumakkelka.'
Nasam-it unay, ragsak nga awan sarday. Ubbog a nasin-aw, ti inna kayarigan. Ngem asiakto pay, no inda makeltay. O, Dios, kaasiannakam, asim ti inka ipaay..."
Wen, kasta ti bugas ti kanta ni Dolly Manuel, ti Queen of Ilocano Songs iti kanta a naadaw iti kaudian a CDna- "DUNGNGO NI NANANG.
DUNGNGO NI NANANG Dolly Manuel Queen of Ilocano Songs
"Ti ayat kas met kadagiti bituen a kasapulanna't
Pannakaurnos iti panagrimatda iti law-ang, nupay
Balinglingen dagiti banag a pagsidsiddaawan iti adayo,
Ket ti dadduma a direksion yugedda ti gasat."
Sagut kadagiti amin nga Amma a mangrambak daytoy naisangsangayan nga aldaw a para kadakuada.
Imdengantayo man, Kailian, daytoy kanta ni Vhen Bautista, ti Prince of Ilocano Songs- AMA, manipud pay laeng iti album a Filipinas, Gamengka Ditoy Pusok.
Request and Dedication:Panangpasingked iti napudno nga ayat nga uray pay aginnadayo, dinto marakrak.
Iti panangidawat a mataginayon ti ayat a nabukel sapay ta di agkupas. Adda kadi pay mabalin a makatubeng iti napudno nga ayat- uray kadi pay inggana't tanem?
Ala man ngarud, imdengantayo ti kanta ni Noraline Domingo a "Sika Laeng" no asino ti pangiruknoyanna daytoy a kantana.
SIKA LAENG kinanta ni NORALINE DOMINGO manipud iti back to back album da ken ni MELO SANTIAGO, "BACK2BACK"
Diak man ammo no kasano A sawek kenka, O Biagko, A sika ti ipangpangruna Ti pusok nga agduyos kenka
Sawem kaniak a sisiakto laeng Ti ayatem ingga't tungpal tanem Karik kenka dikanto ikalang Wenno lumdaang
Sika laeng ti ay-ayatek Kanayon a pampanunotek Riknaem bara ti pammateg A para kenka laeng
Ket sapay ta di agbaliw Panangipategmo kaniak Agnanayon a nasin-aw Napudno ta panagayat
Ikarkaragko iti agnanayon Ayat a binukel di agkupas Awan makatubeng nga uray pay Inggana ken tanem
Request and Dedication: Ala, saan a dakes no nangato ti arapaap ti maysa a tao, ta ti amin a pinarsua ti Dios adda bukod nga arapaap a kayat a tun-oyen wenno gun-oden. Ngem iti kanta ni Manang Andrea Baptista a "Rueda ni Gasat," kayatna nga ilawlawag ken imutektekan kadatayo a ti biag mayarig iti rayus ti rueda nga agpulpuligos. Saan nga agnanayon nga addaka't baba, saan met a kanayon nga addaka't alimpatok. Saan met a kanayon a naamo wenno umay kenka ti naimbag a gasat. Kunana, "No maminsan, naatap kenka ni gasat dika la maup-upay. Ti pagdaksan wenno pagimbagan ket dimo bukbukodan. Panagrang-ay ken pananggun-od ti dayaw intay pagbabalubalan. Tutorem ti magna urayem ti batangmo ditay makapaggeddan..."
Intay man ngarud imdengan ti pudno a kababagas daytoy a kanta ket sursuroentayo koma ti agpakumbaba kadagiti amin nga aramid. Kaskenan, ti ayat!
RUEDA NI GASAT
Komposision ken Kinanta ni Andrea Baptista
Adu ti pasamak iti biag a di maaw-awatan
Adu met ti kunada a masirib ngem di makalulugan
Kunam nga adayoka ti peggad madika ti patigmaan
Ngem no sikan ti seknanna pabasolem ti sabali a parsiak makuna
Nagduduma a prinsipyo ti biag puon ti rinnisiris
Pagtitinnuladan ken pagsisinnalipan ti maysa nga aramid
Panagrang-ay ken pananggun-od ti dayaw intay pagbabalubalan
Tutorem ti magna urayem ti batangmo ditay makapaggegeddan
Ti biag mayarig iti rayus ti rueda nga agpulpuligos
Ita no addaka iti baba 'ton maminsan ti alimpatok
Ket no addakan iti tapaw dimo la liplipatan
Di agmaron kenka ni balligi no dimo talliawen ti nanumo a naggapuam
No maminsan naatap kenka ni gasat dika la maup-upay
Ti pagdaksan wenno pagimbagan ket dimo bukbukodan
Aganuska sursuroem ti aguray gasat pagsusublatan
Ayatem ni Karrubam ta inkanto apiten ti bukel nga immulam
Request and Dedication: Immadayo ni Ay-ayatenna, ngem mangnamnama nga agsublinto manen. Ta uray adda pinnasugnod a napasamak iti nagbaetanda, saan a kas karina nga iwaksi ni Ading Balasang ti kinapateg ni Manong Baro iti pusona. Kunana, "Bay-am ta biagek ti namnama a manapaya nagkasingin a riknata.
Ngem no kas pangarigan ta pumanawkanto manen, addanto pagituredko a manguray ti panagsublim." Apounayen a panagitured ken panagibtur ni ayat. Ta kunana pay, "Ibilangkon a paset daytan ti kalman,
nalpasen ti nalpas pinnasugnod lipatentan..."
Ala man ngarud, Kailian, agbalintayo man a saksi iti napudno a panagayat ni Ading Balasang iti daytoy napnoan kaipapanan a kanta ni Manang Andrea Baptista iti kanta nga "ALDAW TI PANAGSUBLIM."
Request and Dedication:Makaited man iti inspirasion daytoy kansion ni Manang Andrea Baptista kadagiti nakamirduot wenno nakamisuot, dagiti malidlidayan wenno mapukawan iti namnama, dagiti maabak wenno mapaay; kunana kadakuada: "
Umisemka uray no narigat, likudan ti ulep ti init naraniag. Umisemka inka kad agalibtak ta gun-odem napudpudno a ragsak." Kuna pay ni Manang Andrea nga innayon: "Ta nagkadua ti maris ti lubong. Adda ragsak ken panagkumikom, sumipnget man ti lubong iti sardam- Umisemka baro a bigat padaanan..."
Ala wen, intay' man utoben daytoy napintas a kansionna nga "UMISEMKA," maysa nga orihinal a komposision.
Request and Dedication:Nanang, Nanang, sika't kapapatgan. Pammagbagam nagalistokan.Nanang, Nanang, sika't pagtamdan. Silawka naurnos a pagtaengan. Daytoy man ti inruknoy a kanta ni Mikaela Vien Bautista "Nanang" iti dungdungoenna nga Ina idi agtawen la iti lima. Nayanak ni Mikaela diay America ngem makapagsao iti Ilocano.
Ni Mikaela Vien Bautista ket anak da Vhen Bautista [ti Prince of Ilocano Songs] ken Rosario Canto Bautista. Maysa nga orihinal a komposision ni Vhen ti kanta a "Nanang."
Request and Dedication: "Kunak idin no nagbalbaliw ti asawak, dagiti bisionan ket innan linipat. Ngem kaskadi nga inna sinublianan sipud addaakon iti sabali a pagilian..."
"Arak, sugal, shabu ken marihuana; kadagsenan ti pannakikamalalana. Uray koma no adda ti panggedanna, kuarta a paw-itko ti busbusbosenna."
"Sakit ti nakem nga awan kaaspingna, sakripisiok awan nagmamaayanna. Ni lakayko dina man la inkailala, rigrigatko ditoy abroad nga agmaymaysa..."
"Dagiti annakko, piman, ay kakaasi, ti amada adda iti sabali. Addan iti sidong ti sabali a babai, agluaakon ngem diakon pulos maibabawi..."
Request and Dedication:"Komustaka kadin itan, Biagko? Siak kadi pay ti malaglagipmo? No siak man bilang ti kas damagen, sika't innak ar-arapaapen..."
"No siak ditoy awan pagdanagam, kasarsaritak dayta ladawam. Kada awagmo telepono, isu't dengngep daytoy barukongko..."
"Nagrigaten ti long distance nga ayat, itdenna ti iliw ken sanaang. Naginad ti oras nga aglabas, gapu't karayo a di malipatan. Ala wen, agan-anuska, Biagko, idayalmo dayta telepono..."
Kinadueto ni Vhen Bautista,ti Prince of Ilocano Songs, ni Laila Tumbaga, guest singer, iti maysa kadagiti naglatak ken nag-number one a kanta a sinurat met la ni Vhen a napauloan iti "Long Distance Nga Ayat."
Ti orihinal a bersion ti "Long Distance Nga Ayat" ket pinaglatak met la da Vhen Bautista & Adelaida Ramones.
Ti live version da Vhen ken Laila ket nabulod babaen iti imbag nakem ti "Filipinas Live In Concert," produced by Kitt Bingayen of Ilocano Treasures Records & Productions
Request and Dedication:"Ayat ti balbaliksen ti pul-oy, ayat ti ikankanta daytoy barukong. Ayat ti mangpa-init ti rabii, isu't murmurayko ti parbangon."
"Sika ti anghel iti sardam, ket kasigudko dayta ladawam. Uray pay no agaddayota, iti telepono agsarsaritata..."
"Ayat ti ipitpitik 'toy pusok, iliw-lagip kenka biagko. Sungbatam ngaruden 'toy saludsodko, mabayag kad' pay ti yaaymo?"
Ala man, imdengantayo no kasano ti panaginniliw ken panangipeksa ti dua a puso a naginnadayo babaen iti panangrangtay ti telepono ti bosesda...
Iti kaunaan a gundaway, isagut ti "Sika A Musika 'Toy Pusok" ti kanta a "Darasem ti Umay" kinanta da Andrea Baptista ken George Ramos.
